“Shtetrrethim” në Lazarat, policia ndalon punëtorët e drogë

Postuar: Sat Jun 16, 2012 6:10 pm

GJIROKASTËR-Pre pak ditësh në Gjirokastër po vijon një aksion policor për ndalimin e kultivimit të bimëve narkotike në Lazarat.
Policia e Gjirokastrës ka shoqëruar sot 53 persona meshkuj kryesisht nga rrethi i Elbasanit që po udhëtonin në drejtim të Lazaratit përmes kodrave.

Gjithashtu u bllokua dhe një bot me ujë dhe një kamion me pleh që dyshohet se do të përdoreshin për kultivimin e kanabisit.
Ndërkohë forcat e policisë së Gjirokastrës mbështetur edhe nga 2 grupe të FNSH, 2 grupe Delta dhe Task Forca e Qarkullimit po vijojnë kontrollet për bllokimin e çdo materiali dhe fuqi punëtore që nga informacionet rezulton se do të përdoren për kultivim të kanabisit në Lazarat.

Vetëm gjatë ditës së djeshme janë shoqëruar 21 persona, kryesisht nga Cërriku, Elbasani, Skrapari të cilët dyshohen se po shkonin në Lazarat për të mbjellë kanabis.

Policia në bashkëpunim të ngushtë edhe me kryetarin e komunës Lazarat dhe pleqësinë e fshatit po vijojnë kontrollet në gjithë territorin e komunës Lazarat.

Policia ka shtrirë aksionin tek cdo automjet që hyn dhe del në Lazarat. Kështu mësohet se janë hequr xhamat e zinj për 85 automjete nga Lazarati, ndërsa janë vendosur gjoba për cdo shklje si dhe u bllokuan 3 automjetet luksoze që rezultonin të vjedhura.

Fshati i Lazaratit në Gjirokastër jo vetëm është kthyer në një "fabrikë" për prodhimin e hashashit, por tashmë punëson edhe të papunët të kujdesen për bimën narkotike. Brenda kësaj javë së bashku me ditën e sotme, policia ka bllokuar 174 persona që deklaruan se ishin punëtorë që mirëmbanin bimën e kanabisit në Lazarat.

Nga dëshmitë e dhëna në polici ka rezultuar se shumica e personave që ishin punësuar nga lazaratasit për mbjelljen dhe kultivimin e hashashit janë nga lagjet periferike të qytetit muze. Bëhet fjalë për banorë të komunitetit rom në lagjet "Zinxhira" dhe "Punëtori". Ndërsa, të tjerët janë persona të papunë që mblidhen për çdo ditë në sheshin "Omonia". Në këtë grup personash përfshihen jo vetëm banorë nga rrethi i Gjirokastrës, por edhe banorë nga rrethe të ndryshme të vendit (Shkodra, Lezha, Elbasani, Librazhdi etj) që kanë migruar për arsye punësimi në jug të vendit.

2 mijë lekë është aktualisht pagesa për 10 orë punë në ditë në Lazarat. Por, ka dhe punëdhënës lazaratas që këtë verë, duke përfituar nga shtimi i krahut të lirë të punës, paguajnë më pak, 1 mijë lekë.

Nga fillimi i këtij viti, në qarkun e Gjirokastrës në jug të vendit numërohen të jenë kryer mbi 15 operacione antidroge, me 2.4 ton hashash të bllokuar dhe 35 persona ndaluar.

Drejtori i Përgjithshëm i Qarkullimit Rrugor për Shqipërinë, Vullnet Topalli bëri të ditur se, sipas një urdhëri të miratuar pak ditë më parë nga Kreu i Policisë së Shtetit, Hysni Burgaj, në operacionet për parandalimin dhe asgjesimin e bimëve narkotike, së bashku me shërbimet e Antitrafikut, sipas një plani të detajuar, janë përfshirë edhe strukturat e Rendit dhe ato të Qarkullimit Rrugor.

(d.b/BalkanWeb)